Historische Dokumente und Autographen
Louis XIV - Roi + Plessis-Guénégaud, Henri du - Secrétaire d’État
Gravure de Henri du Plessis-Guénégaud.
Pièce signée « Louis » (secrétaire), contresignée par Henri DU PLESSIS-GUÉNÉGAUD (*1610 - †1676), trésorier de l'épargne et puis secrétaire d'état à la maison du roi, secrétaire d'état de la marine, garde des sceaux de l'ordre du Saint-Esprit et conseiller du roi. La Fère, en août 1654. Confirmation de statuts et établissement de collège de médecine en la ville de Dijon par le roi Louis XIV. Document important.
Transcription:
« Confirma(ti)on de statutz et establissem(en)t de college de medecine en la ville de Dijon conformem(ent) a larest du parlem(ent).
Louis par la grace de Dieu Roy de France et de Navarre ; a tous presentz et avenir ; salut. Nostre amé et feal conseiller en noz conseilz et premier medecin le Sieur Vallot, nous a faict remonstrer que comme lart et science de medecine avoit tousiours esté la plus estimée et necessaire pour la vye des hommes pour en estre les effectz bien ou mal applicquez salutaires et mortelz que par la mesme necessitté on avoit tousiours veillé a ce quil nentrast personne audit exercice, que premier il neust rendu des preuves de sa suffisance et capacité dans les colleiges de la faculté de medecine, que les roys noz predecesseurs auvoient a ceste fin establis ez villes de Paris, et Montpellier, ou pour leur esloignem(en)t ceux quy aspirent audit exércice, et quy demeurent ez autres bonnes villes, ne pouvant aller et sejourner esdittes villes de Paris, et Montpellier, qua grandz frais et incommoditez, qu’a cette occasion il seroit necessaire pour le bien et utillité du publicq, quil y eust ez bonnes villes des colleiges de laditte faculté principallement en celles ou les principaulx habittans et medecins, quy y sont habitueez le demanderoient ainsy que font a present les plus anciens medecins de n(ost)re ville de Dijon, quy pour y parvenir ont faict dresser et deliberer des articles statutz et reiglemens concernant ledit art et science de medecine, et iceux communicquez aux mayeur lechevins et procureur scindicq de la ditte ville, et presentéez au parlement dud(it) Dijon, quy auroit par son arrest du vingtiesme septembre mil six cens cinquante, ordonné en ce quy concerne lestablissement dudit colleige de medecine de laditte ville, que lesditz medecins ce pourvoiroient par devers nous, suivant lequel arrest, ledit Sieur Vallot, et lesditz medecins, nous ont tres humblement supplyé leur accorder noz lettres sur ce necessaires ; scavoir faisons qu’apres avoir faict voir en nostre conseil, l’arrest de nostre ditte cour de parlement de Dijon, dans lequel sont incerez lesdits articles statutz et reiglemens, desirant contribuer en tout ce quy nous sera possible au bien et utillitté des habittans de lad(i)te ville de Dijon; nous avons iceux articles statutz et reiglemenz, agréez et confirmez et approuvez, et de noz graces special plaine puissance et auctorité royalle agreons confirmons et approuvons, voullons et nous plaist que conformement a iceux, lesdits medecins puissent, et leur soit loisible d’establir a leurs frais et déspens ou des deniers communs de laditte ville, du consentement des habittans d’icelle, establir led(i)t colleige de medecine, en laditte ville et icelluy entretenir, pour y faire les exercices et fonctions ainsy et en la forme et maniere, quil ce faict et observe ez autres colleiges, establis en nos au(tr)es bonnes villes, et en jouir et leurs successeurs ensemble des honneurs, privilleges, franchises, auctoritéz, et libertez, dont jouissent les autres colleiges de lad(i)te faculté, le tout conformement aud(i)t arrest, sy donnons commandement, a noz amez et feaux conseillers, les gens tenans nostred(i)te cour de parlement de Dijon, que ces presentes ilz facent registrer, et du contenu en icelles souffrent et laissent jouir et user lesdits medecins et leurs successeurs aud(i)t colleige pleinement paisiblement et perpetuellement cessant et faisant cesser tous troubles, et empeschementz au contraire. Car tel est nostre plaisy(r) et affin que ce soit chose ferme et stable a tousiours nous avons faict mettre nostre scel a cesdittes presentes, saouf en au(tr)e chose n(ost)re droict et lauctruy en tout. Donné a la Fere au mois de Aoust, lan de grace mvic cinquante quatre, et de nostre reigne le douziesme.
Louis
Par le Roy
de Guenegaud »
LOUIS XIV dit « le Roi-Soleil » ou « Louis le Grand », roi de France (Saint-Germain-en-Laye 5 septembre 1638 - Versailles 1 septembre 1715 ). Il était roi de France et de Navarre pendant 72 ans, dont 54 ans de pouvoir personnel. C'est le plus long règne connu dans l'histoire de France et même d'Europe.
Lien Wikipédia: Louis XIV de France
Lien Wikipédia: Henri du Plessis-Guénégaud
Taille et type du document: 32x55 cm, parchemin.